مرند شهرینده ادبییاتچی دوستلارین طرفیندن یحیی آلیلونون ” سون دیلک” رومان کیتابینین حاققیندا آراشدیرما و بؤیوکلمه توپلانتیسی قورولدو.
مرند شهرینده ادبییاتچی دوستلارین طرفیندن یحیی آلیلونون ” سون دیلک” رومان کیتابینین حاققیندا آراشدیرما و بؤیوکلمه توپلانتیسی قورولدو. بو مراسیمده محمد صبحدل «تاریخی رومان» و «تاریخ»ین رابیطهسینه توخونوب تاریخی رومانین یارانماسینی تاریخین یئرینده اوتوراجاق بیر ضرورتین نتیجهسی بیلدی. تاریخ یئرینده اوتوران تاریخی رومان ایلک یارانیشیندا میللتین اؤزونه اینامینی آرتیرما مقصدی ایله ایدئال قهرمان یاراتماغا باشلاییر. شووالیهلر و میللی قهرمانلار میللی وارلیغا بیر دایاق کیمی یارانیرلار.
محمد صبحدل سونرا آزلیق(اقلیت=Minör) ادبیاتینا توخونوب، ایقتیدارلا یول-بیر اولمایان هر بیر ادبیاتی آزلیق ادبیاتی بیلدی. بو باخیمدان آوانگارد ادبیات، موهاجیرت ادبیاتی، ائتنیک آزلیقلار، اینانج آزلیقلاری(مذهبی وس.)، ظاهیرده اکثریت اولسا دا عملده آسیمیلاسیونا معروض قالان هر بیر آزلیغی «آزلیق ادبیاتی» بیلدی. بورادا فرانسهلی فیلوسوفلار ژیل دلوز و فیلیکس گاتارینین یهودی اصیللی آلمان یازیچیسی اوزره آپاردیقلاری تحقیقاتا ایشاره ائدیب و آرتیردی کی؛ بونلار تکجه آلمان دیلی ایچینده آزلیق نورمالاری ایله داورانان کافکایا اؤزل بیر ادبیات نورمو تعریفلهییبلر و البته جسارتله ایلک آددیمی آتیبلار. ایران و تورکیهده گئدن باشا آراشدیرمالار دا بونلارین تکراری اولوب.
آزلیق ادبیاتینی حرکته گتیرن ایچ موحرریک ایسه قالماق و یاشاماق دغدغهسی اولوب. هر بیر آزلیق قالماق سیخینتیسیندان قورتولاندا کلاسیکلهشیب و قبول اولونوب.
محمد صبحدل، یحیی آلیلونون«سون دیلک» رومانینا ایشاره ائدهرک، دئدی کی؛ چوخلو مونتقیدلرین ایناندیغینا رغمن آغیر فاجیعهلر کئچیرمک جهانشمول ادبیات یاراتمیر. بو مسئلهیه آغیر فاجیعهنی ریوایت ائتمه باجاریغی لازیمدیر. بو دا تمرین و دیلین دالدا-بوجاغینا و قابیلیتلرینه موسلط اولماقلا یارانار. تاریخ عینی روایت اولارسا، رومان؛ اینسانین ایچ دونیاسی و روحی عالمینین روایتیدیر. تاریخی رومان ایدئال قهرماندان سونرا رئال قهرمانلار یاراداجاق و سونرا رومان؛ پسیخولوژیک و فردی تاریخلره ده کئچیب، اینسانین ایچ دونیاسینی باشقالاری ایله بؤلوشمکده؛ دموکراتیک دونیانین یارانماسینا آددیم آتاجاق. بو ایچ دونیا شفاف بیر اعتراف کیمی اینسانلاری صافلاشدیریب و آریندیرا بیلر و اینسانلارین بیر-بیرینی دوشونمکده اساس آددیم اولا بیلر.
